KALIBO, Aklan—Ginklaro it Philippine Statistic Authority (PSA)-Aklan nga ro pagahiwaton nga National ID registration makaron nga adlaw sa sangka establisiyemento komersyal sa banwa it Kalibo hay eksklusibo eamang para sa mga indibidwal nga tapos eon sa Step 1 registration.
Suno kay Mr. Peter Mangilog, Statistician II it PSA-Aklan nga ro mga pumueoyo nga naka-agi eon sa Step 1 ukon nabue-an it demographic data pa eamang ro kwalipikadong maka-adto sa andang ginapatigayun nga National ID registration.
Dugang pa ni Mangilog nga raya hay para sa mga indibidwal nga may appointment eon.
Ginpasiguro man kara nga magapadayun ro andang pag-rollout it registration agud nga maabot ro tanan nga pumueoyo sa paeaabuton.
Matueopangdan nga base sa anunsyo, ro sangka mabahoe nga mall sa banwa it Kalibo ro magiging host para sa natungdan nga programa nga maga-umpisa makaron nga Hulyo 8 hasta Disyembre 30, 2021.
Nag-apela man raya sa mga pumueoyo nga hugut nga mag-obserba sa ginapatuman nga minimum health protocols agud malikawan ro pagtaeapnan it deadly virus.
