KALIBO, Aklan—Ginklaro it Philippine Statistic Authority ukon PSA Aklan nga uwa sanda it tawuhan nga nagapangbaeay-baeay para usuyon ro national identification card it mga pumueoyo para mapicturan ag ma-scan.
Apang suno kay Rodelyn Panadero, supervising statistical specialist it PSA Aklan nga may mga enumerator nga nagapang baeay-baeay para magcensus angot mat-a sa agricultural and fisheries daea eon ro pagkutana kon nabaton eon nanda ro andang national ID ag kon anu ukon sin-o ro nagdeliver kanda.
Mag-eowas kara, uwa eon sigon sanda it iba pang tuyo sa panimaeay nga andang ginaadtunan.
Ro mga enumerator nga nakaassign sa natungdan nga mga lugar antes pa man mag-atubang sa tagbaeay hay dapat may suksok nga ID ag nagagamit sanda it tablet nga dikato gina-encode ro mga impormasyon nga ginasabat it publiko.
Samtang sa pihak nga parte, ginpadumdom ni Panadero ro publiko nga inde gid pag-itao maskin kanyo ro national ID ag inde magpasugot nga picturan raya ukon i-scan.
Engkaso nga may maghimo kara hay insigida nga magreport sa taeatapan it pulisya bangud nga posibleng scammer eon ro nakasueod sa andang panimaeay.
Nakabaehag sa national ID ro mga importanteng detalye sa aton nga pagkatawo.
