KALIBO, Aklan–Nag-umpisa eon ro Philippine Statistics Authority (PSA)-Aklan sa pagpatigayun it 2022 National Demographic and Health Survey umpisa ko Mayo 2 ag magabuhay it hasta buean it Hunyo.
Ginpahayag ni Rodelyn Panadero it PSA-Aklan, ro nasambit nga survey hay andang ginapatigayun sa pilang ka mga lugar sa bilog nga probinsya.
Naga-abot sigon sa 35,000 ka mga sample ro gintaeana makaron nga dag-on para sa bilog nga nasyon kung siin nagagamit sanda it tablet sa pagbuoe it mga impormasyon.
Ro National Demographic and Health Survey hay ginapatigayun it sang beses sa sueod it limang dag-on nga nag-umpisa ko 1968.
Raya hay gindisenyo para makatao it impormasyon eabi eon sa mga kababayin-an pag-abot sa fertility levels, family planning, maternal and child health, reproductive health, domestic violence ag iba pang health indicators.
Ro survey hay bukas para sa mga babaye nga naga-edad it 15 hasta 49 anyos.
