KALIBO, Aklan—Nagapadayun pa ro pag-register it Philippine Statistic Authority (PSA)-Aklan it mga dugang nga barangay ukon indibidwal nga naeakip sa step 1 it Philippine Indentification System (Philsys).
Suno kay Mr. Peter Mangilog, Statistician II it PSA-Aklan nga natapos eon nanda ro unang target nga 94,500 nga indibidwal nga gin-resgister ko Marso 30.
Apang, nagdugang man it workload ro PSA Central Office kun siin halin Abril 10 hasta 30 hay magadugang sanda it pilang ka mga indibidwal nga iga-rehistro.
Raya sigon tanan hay para sa unang tikang it registration it National ID.
Ro pagpili sigon nanda it mga barangay hay base sa lebel it kapigaduhon it lugar.
Ginpaathag man ni Mangilog nga may tatlong ka mga tikang ro Philsys kun sa siin ro una hay kinahang-ean anay nga magpa-register it mga pumueoyo para mabuoe ro andang demographic data; pangaywa hay ro pagbuoe it biometric ag facial picture ag ro step 3 hay ro pag-isyu eon it Philsys Number ag ID.
Ginpasaeamatan man kara ro kooperasyon it publiko sa natungdan nga programa it gobyerno.
Nagaeaum man imaw nga antes matapos ro dag-on hay maumpishan eon ro step 2 it programa.
