KALIBO, Aklan—Ginturn-over eon it Philippine Statistics Authority ukon PSA-Aklan sa siyam nga local government units sa probinsiya it Aklan ro natipon nga datos sa ginpatigayon nga 2022 Community-Based Monitoring System ukon CBMS sa tanan nga mga panimaeay.
Raya ro ginpahayag ni Engr. Antonette Catubuan, chief statistical specialists it PSA-Aklan.
Suno kana nga ro Aklan ro may pinakamaabu nga numero it mga LGUs nga nagpasakop sa CBMS sa bilog nga Western Visayas nga nag-abot sa 11 nga munisipyo.
Raya hay ginsundan suno kana it Iloilo ag Antique.
Sa nasambit nga numero, tatlong banwa ro ginbuligan it andang ahensiya sa pilang mga gaeastuson nga ginaeakipan it Buruanga, Tangalan ag Lezo nga makabig nga 5th class municipalities.
Samtang ro waeo nga iba pa hay ginpondohan it natungdan nga LGUs.
Gindugang pa kara nga ro Data Turnover Ceremony hay mabahoe nga bulig sa mga munisipyo.
Ginpaathag ni Engr. Catubuan nga ro CBMS nga nag-umpisa ko Agosto 8 hay nagatuyo nga magkolekta it komprehensibong mga impormasyon halin sa kada household nga pagagamiton it gobyerno agud nga matumod ro mga target nga beneficiaries sa mga social protection programs, pagtumod sa mga ginakabig nga pobre ag makahimo it mga nagakaigo nga polisiya ag programa para sa poverty alleviation ag economic development.
Kadungan kara, ginpasaeamatan it PSA-Aklan ro tanan nga mga respondents sa mga datos nga gintau.
Sa pihak nga parte, ginpaathag pa nana nga ro 11 nga nagpasakop sa 2022 CBMS hay maga-update eon lang it mga natipon nga datos sa masunod nga mga dinag-on samtang ro an-um nga owa pa hay maga-umpisa pa eamang.