PSA, gin-anunsyo nga libre ro pagbueo it birth ag marriage certificate it mga first time job seeker

KALIBO, Aklan—Gin-anunsyo it Philippine Statistics Authority ukon PSA nga libre ro pagbueo it birth ag marriage certificate it mga first time job seeker bilang bulig kanda.

Ginpaathag ni Glenda Sampaton, registration officer II it PSA Aklan nga ro nasambit nga programa hay sa idaeom it Republic Act 11261 kon siin ginaduea ro mga fees sa mga dokumentong requirements it mga nagausoy it trabaho nga gin-umpisahan pa ko buean it Enero.

Apang, ginkasubo it ahensya nga daywa pa eamang ro nakabenepisyo sa nasambitang programa.

Tuyo it nasambit nga programa nga makabulig sa mga indibidwal eabi eon sa mga bag-uhan nga naga-usoy it trabaho bangud nga raya ro mga nagapangunang requirements nga ginapa-comply it mga kompanya.