KALIBO, Aklan–Gin-aprubahan sa ginpatigayun nga session it Sangguniang Panlalawigan ro ginpasa nga sangka ordinansa it Provincial Social Welfare and Development Office (PSWDO) ko Abril 18, 2022.
Tuyo kara nga masiguro ro pondo para sa pilang ka mga programa it taeatapan partikular ro pagtao it social pension sa mga indigent senior citizen, pagtao it dugang nga bulig pinansyal sa mga centenarian ag Child Development Workers.
Ginpahayag ni Provincial Social Welfare and Development Officer Evangelina Gallega nga mabuhay eon raya nga programa it Provincial Government.
Pinaagi sigon sa ginpasa nga ordinansa hay mas mapabakod ro mga proyekto ag masigurado ro pag-alokar it pondo.
Ro ginatanyag sigon nga social pension it taeatapan hay local version it programa it national government kung siin kwalipikado nga maging benepisyaryo kara ro mga senior citizen nga owa naeakip sa listahan it munisipyo ukon Department of Social Welfare and Development (DSWD).
Ro kada benepisyaryo suno kana hay sarang makabaton it P500 nga social pension nga ginatao kada tatlong buean.
Samtang, ro mga indibidwal nga makaabot it 100 anyos hay makabaton man it dugang nga P25,000 mag-euwas pa sa ginatao nga P100,000 it gobyerno nasyonal.
Ginpahayag dugang nga nagatao man sanda it P300 nga cash assistance kada buean para sa mga Child development worker sa probinsya.
