HEALTH News–Ginarekomenda eon ni Health Secretary Ted Herbosa sa Malacañang nga boe-on eon ro COVID-19 public health emergency bangud nga bukon eon sigon it grabe ro paeag sa ikamayad nga eawas makaron.
Ginpahayag ni Herbosa nga masarangan eon nga boengon ro COVID-19 kapareho it ibang ordinaryong sakit kapareho it ubo, eagnat ag sip-on rason nga owa eon it makabig nga emergency.
Gindeklara ni dating pangueong Rodrigo Duterte ro state of public health emergency sa pag-umpisa it pandemya ko Marso 2020 agud nga pahueagon ro nasyunal ag lokal nga gobyerno ag mag-obra it mga programa ag inisyatibo para maprotektahan ro publiko kontra sa makataeapon nga sakit.
Sa idaeum it Proclamation 922, magapabilin raya hasta nga owa ginabo-oe it pangueo it nasyon.
Magkaiba sigon ro COVID-19 state of public health emergency ag state of calamity nga nag-expire eon sa pagtapos it Disyembre 2022.
Ro state of calamity ro nakasentro sa regulasyon it COVID-19 vaccines, clearance it mga bueong kontra virus ag pagpabilin sa manaba nga presyo it mga raya.
Nakabaehag man kara ro emergency procurement it gobyerno, tax exemptions sa mga donors, pagkontrol sa presyo it mga bueong ag testing kits kamana man ro benepisyo sa mga healthworkers.
Sa pihak it proposisyon nga wakasan eon ro state of emergency, ginklaru ni Herbosa nga magapabilin gihapon ro alert level system sa nasyon.