KALIBO, Aklan–Sigidas makaron ro mga ginapatigayun nga public hearing it lokal nga gobyerno it Balete angot sa andang ginproponer nga nagkaeain-eain nga ordinansa.
Suno kay Vice Mayor Patrick Lachica nga kakatapos eamang it andang public hearing angot sa uman nga pagbalik it curfew sa sueod it sang dag-on para sa mga menor-de-edad.
Nakabaehag sigon dikara nga umpisa alas-10:00 it gabi-i hasta alas-4:00 it aga-aga hay owa eon dapat it mga menor-de-edad nga makit-an nga nagawarang ukon sa guwa it tagsa ka panimaeay.
Dugang pa kara nga nakataeana man sanda nga magpatigayun it public hearing angot sa pagregular it mga tangab sa kasubaan eabi pa ag masami eon ro pagbaha kada tyempo it tag-uean.
Mag-euwas kara, sambilog pa sa andang ginakasakuan makaron nga unang kwarter it dag-on hay ro pag-revisit sa mga naga-eksister nga ordinansa it banwa ag ro resolution angot sa mga patholes sa national highway.
Tuyo sigon kara nga mataw-an it atensyon ro tanan nga concern ag igtueopangod ro mga kinahang-eanon it mga pumueoyo.
