KALIBO, Aklan—Nag-apela ro pamunuan it Kalibo Public Market Vendors Association, Slaughter House and Bagsakan Center sa lokal nga gobyerno nga pasugtan anay ro mga bumaeakae nga temporaryong magparking it andang motorsiklo sa kilid it karsada sa palibot it tindahan.
Suno kay Mr. Arnel Meren, Presidente it Kalibo Public Market Vendors Association nga kaeabanan sa ginareklamo it mga manugbaligya ag bumaeakae ro kawad-an it parking area.
Dapat sigon nga bue-on anay ro mga nakapaskil nga “No parking” sign sa palibot it tindahan agud nga ma-engganyo ro mga pumueoyo nga magbakae.
Umpisa sigon kat magtuhaw ro pandemya hay apektado eon ro andang kita tuga it pagsoeputan it mga talipapa ag pagmahae it pamasahe.
Sambilog pa sa ginaka-dismaya ni Meren hay ro pagtaeana it oras sa pagpasueod it mga ginakatay nga baboy sa slaughter house it Kalibo.//Owa sigon raya nagakabagay bangud nga owa it orasan ro pag-abot it mga suplay.
Sa pihak nga parte, ginkondena man kara ro naging pahayag ni Market Master Abel Policarpio nga daehon eon lang pauli it mga vendors ro andang nabilin nga baligya agud nga indi matakaw.
Raya hay kasunod it mga napabalitang insidente it panakawan sa sueod it tindahan.
Suno kay Meren, dapat nga mas pabaskugon ro pagbantay sa tindahan ag itugyan sa mga gwardiya ro responsibilidad sa oras nga may maduea nga baligya.
