KALIBO, Aklan—Ginapadahan makaron it mga eksperto ro publiko sa sakit nga ‘Japanese Encephalitis’.
Suno kay Dr. Philip Ian Padilla, public health expert it University of the Philippines ukon UP-Visayas nga kapareho it “dengue virus”, ro “Japanese Encephalitis”, hay sangka virus man nga daea it mga insektong nagasuyop it dugo kapareho it namok.
Nakalista eon suno kana it kaso kara sa Western Visayas kun sa siin pila sa mga pasyente hay namatay.
Makamaeatay sigon ro sakit kon indi maagapan eabi eon kon unga ro madapuan.
Ro mga sintomas kara suno kay Dr. Padilla hay kapareho it trangkaso, mataas nga eagnat, grabeng sakit it ueo, pagsuka ag pagka-gaoy.
Kon indi maagapan ro pasyante hay makaangkon sigon it pagkasamad sa selyula it utok ukon pagkaparalisado ag kamatayon.
Kapareho sa dengue, pag-dahan ro pinaka-epektibong armas para indi madapuan it “Japanese Encephalitis.”
Pirme sigon nga maglimpyo sa sueod ag guwa it baeay eabi eon ro mga posibleng pamugaran it namok.
