KALIBO, Aklan — Una eon sa mayad nga kahimtangan ro sangka pulis matapos aksidenteng mabaril it anang kaibahan sa sueod it sangka pavement sa Barangay Dit-ana, Madalag, Aklan.
Ginasugid nga aksidenteng nabaril si Police Corporal Jose Brady, 35, residente it Panit-an, Capiz it anang kaibahang si Police Corporal Erwin Magarzo, parehong naka-assign sa 1st Aklan Provincial Mobile Company bandang alas-10:00 it gabi-i samtang nga nagapahaum eon nga magakatueog sa andang natungdan nga mga duyan.
Base sa report it Madalag Police Station, ginbo-oe sigon ni Magarzo ro anang nakasandig nga M16 armalite rifle ag ginsaylo sa anang waea nga portion it gina-eugban.
Apang, sumab-it raya sa musketero ag aksidenteng eumupok ag tinamaan si Brady it bumandang bala sa anang ueo.
Insigidang ginbiyahe sa sangka ospital sa siyudad it Iloilo si Brady bangud nga owa it available nga neuro-surgeon sa provincial hospital samtang si Magarzo hay ginkustodiya it andang hepe nga si P/Major Donel Regis.
Ginasugid nga nagpatigayon it Oplan Galugad ro tropa sa nasambit nga banwa.
Samtang, ginpahayag nga owa eon man it plano nga magpasaka it kaso ro pamilya ni Corporal Brady bangud sa pagpati nga aksidente ro natabu.
Nagpromisa man sigon ro pamilya Magarzo nga magatau it bulig pinansiyal.
