KALIBO, Aklan — Ginkumpirma ni Engr. Marlon Velez, head it Land Transportation Office (LTO)-Aklan nga nabaton eon it pulis nga driver it patrol car nga naeakot sa road crash incident sa banwa it Tangalan ko hapon it Domingo, Mayo 25 ro show cause order nga gin-isyu it andang regional office.
Suno kana nga pagataw-an ro driver nga nakilaea kay Corporal Carillo it Malay Municipal Police Station it limang araw agud nga magpaathag kon ham-an nga indi dapat nga pagasuspindihon ro anang drivers license ag ham-an nga natabu ro insidente.
Madumduman nga bumunggo sa kilid it sangka baraka ro patrol car it nasambit nga police station sa Brgy. Tamalagon, Tangalan.
Ginasugid nga bangud sa madanlog nga karsada ag medyu madasig nga daeagan it saeakyan rason nga tumiyog raya sa pag-apply it preno.
Kaibahan ni Corporal Carillo si PSSgt Angeles kat matabu ro aksidente .
Halin sa Kalibo ro daywang pulis ag magapa-uli eon kunta.
Nakadepende sigon sa legal department it LTO central office ro pagdesisyon kon acceptable ro explanation it sangka motorista nga nataw-an it show cause order.
