KALIBO, Aklan—Patay ro sangka police officer matapos nga madisgrasya sa ginasakyang motorsiklo kahapon it agahon sa bahin it Sitio Cabcaban, Brgy. Fulgencio, Balete.
Nakilaea ro biktima nga si Patrolman Genesis Javil, presenteng naka-assign sa Police Station 2 it Malay Police Station.
Base sa impormasyon ni P/Cpl. Bryan Lebuna it Balete Police Station, nagapasueod eon kunta sa anda nga duty sanday PAT. Genesis Javil, residente it Cumboranan, Tapaz, Capiz, angkas si PAT. Michael Jay Handoy, residente it Dumarao, Capiz, kat maduea-an it kontrol sa manibela si Javil sa palikuon nga porsyon it nasambit nga lugar.
Nakaangkon it pila ka mga gasgas ag lastro sa kaeawasan ro daywang ka mga pulis.
Ginasugid nga may ginbatyag nga pagsakit sa anang tiyan nga porsyon si Javil tuga it disgrasya.
Gilayon man nga gindaea sa ospital sa banwa it Kalibo ro mga biktima sakay it sangka tricycle nga nandang asub-eang.
Apang, makataliwan ro pilang oras hay gindeklara it nagtatap nga doktor nga namatay si Javil samtang ginabueong.
