KALIBO, Aklan—Syento porsyento eon nga haom ro Kalibo Municipal Police Station pag-abot sa security measure para sa tatlong adlaw nga aktibidad may kaangtanan sa opening salvo it Kalibo Sto. Niño Ati-atihan Festival 2024 nga maga-umpisa makaron nga adlaw it Biyernes ag magabuhay hasta sa adlaw it Dominggo.
Suno kay PLt.Col. Ricky Bontogon, hepe it Kalibo PNP Station nga nakalatag ag plantsado eon ro deployment plan it pulisya sa pagsikyar it seguridad ag kaeowasan it mga magatambong sa aktibidad nga ginpahaom it lokal nga gobyerno it Kalibo kon sa siin ro pinaka-highlights kara hay sa adlaw it Sabado ro sadsad-salvo kon sa siin pagapasakupan raya it kapin sa 75 ka mga tribu ag grupo nga magapasundayag sa mga nagapangunang daeanon sa banwa it Kalibo.
Angot kara, makaangkon it re-routing it mga nagkaeain-eain nga behikulo para sa maayos nga daeagan it trapiko.
Ginaeauman nga ro tatlong adlaw nga aktibidad hay pagatambungan it libo-libong tumaean-aw bangud nga raya eon ro pasamit ag pag-umpisada it mga makit-an sa 2024 Ati-atihan Festival.
