Nakaguwa eon it ospital ro 39-anyos nga pumpboy nga naigpit sa tunga it daywang saeakyan sa sangka gasolinahan sa Osmeña Avenue, Kalibo, hapon it Martes, Agosto 4, 2026.
Base sa inisyal nga imbestigasyon, maga-assist kunta ro biktima sa pag-atras it sangka delivery truck matapos raya nga magpakarga it gasolina. Sa pihak kara, sangka pick-up nga sa likod ro nagkasaea it pag-eaum nga imaw ro ginapa-atras it pumpboy rason nga umatras man ro saeakyan.
Bangud kara, naigpit ro biktima sa tunga it delivery truck ag pick-up ag nag-angkon it pagpaeanakit it anang likod ro biktima. Insigida imaw nga gindaea it mga rumespondeng tawuhan it BFP-Kalibo sa Aklan Provincial Hospital kun sa siin ginpaidaeum sa X-ray examination.
Base sa pinaka-ulihing impormasyon, owa man it nakitang bali sa eawas it biktima rason nga ginpasugtan imaw nga maka-uli matapos nga mataw-an it nagakaigo nga pagbueong.
Samtang, gindaea sa Kalibo Municipal Police Station ro daywang saeakyan para sa nagakaigo nga imbestigasyon ag disposisyon.
