KALIBO, Aklan–Eubus nga ginpasaeamatan ni Punong Brgy. Neil Candelario it Poblacion, Kalibo ro mabahoe nga proyekto nga ginaeauman nga makabulig sa banwa it Kalibo nga masolusyunan ro mga pagbaha-baha kapin eon kon may sigidas ag mabaskog nga pag-inuean.
Suno sa Kapitan, gin-inagurahan ko nagtaliwan nga adlaw it Biyernes ro Pumping Station project nga ginbutang sa Purok 2, C. Laserna St. Poblacion, Kalibo nga nagabalor it masobra P96 Million pesos.
Ro nasambit nga proyekto hay iga-construct it Department of Public Works and Highways ukon DPWH pinaagi sa naging inisyatibo man it lokal nga gobyerno it Kalibo nga kaparte it Flood Mitigation Management kon sa siin punterya raya nga matapos sa Enero 2026.
Nasayuran nga ro banwa it Kalibo hay ro catch basin it tubi-baha halin sa mga kaeapit nga banwa rason nga mabahoe ro maibulig it flood control project nga masalbar ro mga propyedad it mga pumueoyo nga naga-istar sa mga manaba nga lugar sa oras nga tumama ro bagyo.
