KALIBO, Aklan — Eubusan eon nga nahueog sa suba ro sambilog sa an-um nga pumping station it water district sa Aklan sa bahin it Barangay Tigayon, Kalibo matapos marumpag ro eugta bangud sa pag-apaw it Aklan River tuga it epekto it bagyong Agaton.
Sa interview it Bombo Radyo Kalibo, gin pahayag ni Metro Kalibo Water District (MKWD) information officer Frederick Buenavidez, nga sa mayad nga swerte hay nahakot eon nanda ro andang mga gamit bago pa man bumigay ro andang pumping station.
Gin pahayag pa kara nga mabuhay eon nandang gina reklamo kaibahan ro iba pang residenteng naga estar maeapit sa suba sa Department of Public Works and Highways (DPWH)-Aklan ro gina kahadlukan nga maeapnagon nga pagkarumpag it eugta hasta sa mas pang lumala ro problema bangud sa epekto it bagyo.
Gin pahayag dugang pa kara nga gin tukod ro pumping station ku 1990’s nga may haeos 50 metros pa ro distansiya sa kilid it suba.
Bangud sa insidente, nagpaandam ro MKWD sa pagkaangkon it mahinang supply it tubi eabi eon sa selebrasyon it Ati-Atihan festival ag sa mga oras nga maabo ro nagagamit kara.
Samtang, ginpahayag kaina sa Bombo Radyo ni DPWH-Aklan District Engr. Noel Fuentebella nga naka-schedule eon ro pagpatigayun it re-chanelling sa suba, apang, gina hueat pa nanda nga maging normal ro tiempo.
