POLICE Report — Patay ro sangka punong barangay ag daywang iba pa nga kaibahan kara kamana man nga tatlo ro naninahan matapos nga araduhon it truck ro ginasakyan nga tricycle sa Maria Aurora sa Baler.
Nakilaea ro mga namatay nga sanday Kapitan Mauro Castillo, 54 it Barangay Baubo; Emily Ancheta, it Barangay Bazal, ag Roderick Mapindan, Barangay Zabali, Baler, Aurora.
Padayun man nga ginabueong sa ospital ro mga naninahan nga sanday Rowena Castillo, Pilaya Ancheta, 56, it Barangay Bazal, ag Marie Biato.
Sa kustodiya eon it Maria Aurora Municipal Police Station ro suspek ag driver it truck nga si King Gil Reyes, residente it Barangay Poblacion 2, it nasambit nga banwa.
Base sa report it kapulisan, bandang alas-9:30 it gabi-i kat matabu ro insidente sa prente it Maria Aurora National High School sa Barangay San Joaquin it nasambit nga banwa.
Sa imbestigasyon it kapulisan, nakipaglamay ro mga biktima sa namatay nga si Vice Mayor Amado Geneta bangud sa baeatian.
Samtang nagapa-uli ro mga biktima sa andang baeay sakay it daywang tricycle ag pag-abot sa nasambit nga lugar hay gulpi eamang sanda nga gin-arado it truck nga ginamaneho ni Reyes.
Sa kabaskog it impact hay naguba ro tricycle ag inapok ro mga biktima nga nagresulta it pagkamatay it tatlo ag pagkanina it tatlong iba pa.
Matapos ro insidente, nadakpan si Reyes ag makaron hay nagapangatubang sa mga kasong multiple homicide ag multiple physical injuries sa Aurora Provincial Prosecutor’s Office.
