KALIBO, Aklan—Hugot nga ginapamaeabagan ni Yapak punong barangay Hector Casidsid ro planong pagpasugot it lokal nga gobyerno sa operasyon it Philippine Offshore Gaming Operator ukon POGO ag Casino sa mainland Malay.
Suno kana, inde eon dapat pagpasugtan nga makaoperate ro mga ilegalista kapin eon sa makaron nga panyempo nga nabutang raya sa kontrobersiya bangud sa ginakaeakutan nga illegal nga mga hilimuon.
Ginpanindugan ni Casidsid nga uwa dapat it puwang sa banwa ro mga raya nga negosyo nga halit ro daea sa mga pumueoyo.
Madumduman nga sa ginpatigayon nga Diplomatic and Business Forum nga ginhiwat sa Belmont Hotel sa isla it Boracay ko buean it Abril hay ginsambit it alkalde ro pagpasugot sa operasyon it Philippine Offshore Gaming Operator ukon POGO ag Casino sa mainland Malay para makatao it dugang nga trabaho ag pangabuhian sa mga pumueoyo.
Mag-eowas kara, gintaw-an nana it ideya ro mga investors nga gustong magpatindog it high rise building kon sa siin allowed eamang raya sa mainland Malay bangud nga 6 storey building eamang ro pwede nga maipatindog sa isla it Boracay.
Ro mga plano it lokal nga gobyerno hay uwa eamang nakatutok sa isla it Boracay kundi maging sa bilog nga banwa it Malay.
