Kalibo Aklan ———–Todo-depensa si Punong Barangay Arnaldo Paloma it Odiong, Altavas sa alegasyon it pamilya Benedicto nga gingamit it personal ro patrol it Barangay rason nga owa raya hagamit sa pagdaea sa ospital sa kalibo it anang gumankon nga manug-unga.
Suno kay Kapitan Paloma nga owa it sin-o man ro nag-agto sa andang baeay agud nga mag-ea-ong sa paggamit it saeakyan.
Gindugang pa kara nga gin-ueayhon man lang ro paghakot it semento halin sa andang baeay paagto sa fishing port nga proyekto it munisipyo.
On-call suno kana ro driver it andang patrol ag kinahangean pa nga mag-usoy it PPE eabi eon kon nagahatud it pasyente sa ospital bilang requrement.
Nasayuran nga nagpaabot it reklamo sa Bombo Radyo si Genra Benedicto matapos nga gina-alegar nga ginpasa-pasahan kat magpangayo it bulig .
Ginturo man sigon sanda it sangka konsehal nga mag-agto kay kapitan kon may available nga driver.
Gintinguhaan sigon nanda nga tawagan si Kapitan apang unattended ro anang cellphone.
Bangud kara, nag-usoy eon lang sanda it pamaagi nga madaea ro andang pasyente sa ospital sa Kalibo.
Apang makataliwan ro pilang minutos hay ginasugid nga umagi ro patrol nga may karga nga mga semento nga ginkaeain it andang buot.
Kadungan kara, nagpangayo it pasaylo si Kapitan Paloma kon nagkasaea gid man imaw.
