KALIBO, Aklan—Nagpahayag it pagkabaeaka si Punong Barangay Rizal “Ric-Ric” Rodriquez Jr., it Cabugao, Batan ag presenteng ex-officio member it Sangguniang Bayan it Batan kontra sa bag-ong investment scam nga Bagong Bansang Maharlika ukon BBM.
Suno kana nga may pilang indibidwal ro nagalibot sa andang barangay kun sa siin pila sa mga raya hay anang kakilaea ag tumandok man it nasambit nga lugar.
Nagapang-recruit sigon ro mga raya ag ro mga gustong maging miyembro hay ginasukot it 100 pesos para sigon sa pagpa-obra it andang ID ag ATM card.
Gina-engganyo man ro mga miyembro nga mag-invest kanda .
Dugang pa nga ginahambaean man ro mga gina-recruit nga indi sanda makabaton it ayuda halin sa gobyerno kon indi magapasakop sa andang grupo.
Apang sa anang pag-usisa, natukiban nga raya hay sangka klase it investment scam.
Samtang, nagakabaeaka man si Kapitan Rodriquez matapos nga nagpa-picture kana ro pilang miyembro it BBM bangud nga posibleng magamit ro andang litrato agud nga paguwaon nga may permiso kana ro andang paglibot sa mga kabaeayan.
Angot kara, plano nana nga idangop ro isyu sa Department of the Interior and Local Government ukon DILG, Philippine National Police ag sa session it Liga ng mga Barangay Aklan Chapter bilang bise presidente it asosasyon agud nga mataw-an it awareness ro iba pang mga punong barangay sa bilog nga probinsiya.
