KALIBO, Aklan—Ginpahayag ni Punong Barangay Melvin Masula it Brgy. Lanipga,Tangalan nga owa imaw it ideya angot sa alegasyon nga may sangka barangay kagawad nga nagbuhin sa nabatun nga suweldo it mga pomoeuyo sa idaeum it Tulong Panghanapbuhay sa Ating Disadvantaged/Displaced Workers (TUPAD) program nga ginlunsar it Department of Labor and Employment ukon DOLE.
Apang ginpasiguro man ni Masula nga bukas ro anang taeatapan engkasong may mga pomoeuyo nga gustong magreklamo kontra sa andang mga opisyalis.
Nasayuran nga sa andang barangay hay may kapin sa 50 katawo nga mga benipisraryo it TUPAD program kun sa siin ro andang pay out hay ginpatigayon kahapon sa Brgy. Tagas.
Ro kada barangay kagawad sigon hay ginpapili it ap-at ka mga benipisyaryo samtang si Kapitan man ro nagpili it 10 nga iba pa.
Sa makarun hay gusto sigon nana nga maka-atubang ro mga tagreklamo agud nga maipatawag kung sin-o man ro opisyal it barangay nga nagahimo it bukon it tama.
