Uwa it mabakante nga posisyon bangud sa ginatawag nga law of succession.
Raya ro ginpahayag ni Aklan first district board member Nemesio Neron, designated spokesperson ni Liga ng mga Barangay President Alma Neron kasunod sa ginpaguwang suspension it sangguniang bayan kanday Punong Barangay Risa Relojo ag Barangay Kagawad Lyzette Reposar it Cupang, Banga bangud sa ginapangatubang it mga raya nga Administrative Case No. 2022-002 nga pirmado ni Banga Mayor Erlinda Maming.
Kapin sa an-om nga buean ro suspension nga ginapangatubang ni Relojo samtang daywang buean mat-a ro kay Reposar.
Ro daywa hay temporaryong inde makabaton it andang honorarium.
Suno pa kay board member Neron, ginsuspinde ro mga raya it investigating pannel agud nga inde maapektuhan ro mga ebidensya nga andang ginabuytan bangud nga may access sanda sa tanan nga mga dokumento it taeatapan.
Madumduman nga ginreklamo ro daywa bangud sa paggamit it pondo it barangay sa anang personal nga kinahang-eanon.
