KALIBO, Aklan—Hugot nga ginpamalibaran ni Brgy. Capt. Jess Salonzo it Can-awan, Libacao ro mga naga-eanog nga balita sa andang lugar nga infected imaw it coronavirus disease 2019 ukon covid-19.
Suno kana nga maskin sa social media hay nag-post imaw it anang mensahe agud nga maklaruhan ro tanan.
Owa suno kana imaw it ideya kon sin-o ro nagpakalhit it nasambit nga unverified report nga nagtuga it kasakit sa anang baeatyagon bangud nga maskin siin imaw mag-agto hay nagalikaw kana ro mga tawo.
May kahigayunan sigon nga kon naga-agto imaw sa pagtipon-tipon hay may nagasita kana nga dapat hay magpabilin imaw sa quarantine facility.
Kadungan kara, ginklaru ni kapitan Salonzo nga owa imaw nakasueang sa pag-uli it anang magueang halin sa ibang nasyon bangud nga idtu imaw nagatinir sa andang baryo.
Gindugang pa kara nga bukon man it infected it virus ro anang magueang ag iba pang miyembro it anang pamilya, kun sa siin, bilang pagsunod sa protocol, ginsueang raya it ambulansiya it libacao ag gin-daea sa andang baeay sa Brgy. Poblacion, Libacao para sa daywang dominggo nga quarantine procedure.
Samtang, nagpanawagan man imaw sa tanan nga maging responsabli ag indi magpakalhit it mga saea nga impormasyon sa tunga it ginapangatubang nga covid 19 pandemic.
Makaron sigon nana eubus nga naintindihan ro baeatyagon it mga nag positibo sa sakit nga nakaexperiensiya it diskriminasyon.
