KALIBO, Aklan—Ginpabaehag sa Banga Municipal Police Station it sangka ginang ro insidente kon sa siin may nagpundo nga puti nga van sa anang mga onga samtang nagahueat kana sa waiting shed nga natabo sa Brgy. Manggan, Banga.
Suno sa ginang nga si Melalin Naelga it Brgy. Pagsanghan, Banga, gin-istorya sigon kana it daywang ka mga onga nga ginpunduhan ro mga raya it saeakyan ag ginapasakay apang naging alerto ro daywa matapos makit-an nga may mga onga pa sa sueod it van nga naka-packing tape ag nagapakitabang bangud nga ginkidnap sigon sanda.
Bangud kara, gilayon nga nagdaeagan paeayo ro daywang ka mga onga pagkakita sa tuwalya nga bitbit it sangka eaeaki nga posibleng itabon kanda rason nga uwa sanda napasakay sa van.
Ginkumpirma it ginang nga nakit-an nana nga nag-agi sa anang likod ro saeakyan apang uwa gid imaw it ideya nga dato eon gale ro natabo sa anang mga onga.
Bangud sa insidente, nagtuga raya it kahadlok ag kabaeaka rason nga ginpakamayad nana nga ipa-blotter sa taeatapan it pulisya ag gin-aware man ro mga ginikanan pati ro mga manugturo sa eskwelahan.
