KALIBO, Aklan – Nagapangatubang sa Comprehensive Dangerous Drugs Act ro sangka PUV driver matapos nga madakpan sa ginpatigayon nga buy bust operation bandang alas-12:30 kaina it aga-aga sa Brgy. New Buswang, Kalibo.
Nakilaea ro suspek nga si Rowen Vacnot Macario, 33, van driver ag residente it Brgy. Lupo, Altavas , apang presente nga naga-istar sa nasambit nga lugar.
Narekober sa suspek ro sangka sachet it ginadudahan nga shabu kabaylo it P8,000 nga buy bust money, mga drug paraphernalia ag cellphone nga ginagamit sa anang drug transaction.
Sa pagrekisa sa anang eawas, nabo-oe dugang ro sangka sachet it suspected shabu, wallet nga may sueod nga driver’s license ag P700.
Base sa report, naghana pa nga magpaeagiw ro suspek sa mga umarestong pulis rason nga nakaangkon it komosyon.
Si Macario hay gindaea sa Iloilo para sa drug test kamana man nga ipaidaeum sa laboratory examination ro mga epektos nga narekober sa anang posesyon ag kontrol.
Ginasugid nga barato ro pagbaligya it suspek sa anang mga parokyano sa balor nga P300 hasta 500 kada sachet.
