KALIBO, Aklan—Ginareklamo it pilang mga drivers ag operators it Public Utility Vehicles ukon PUVs ro pila sa andang mga pasaway nga pasahero sa bukon it tama nga pagsuksok it face mask ag face shield samtang nakasakay sa mga pampasaherong saeakyan.
Suno kay Leland Laurente, collector/operator it Eastern Side Terminal nga pilang mga drivers eon nanda ro nasita ag na-isyuhan it ticket matapos nga makitang owa it suksok ukon bukon it maayos ro pagkasuksok it face mask ag face shield it andang mga pasahero sa checkpoint sa Brgy. Tigayon, Kalibo.
Ginarason sigon it ibang commuters nga nakalipatan nanda ro pagsuksok.
Dugang pa ni Laurente nga masyadong mabahoe ro multa sa mga driver nga naga abot sa 2,500 pesos bangud sa pag-eabag sa health protocols.
Rason nga antes suno kana nga maghalin sa terminal hay ginapadumdum it andang dispatcher ukon konduktor ro mga pasahero nga indi pagkalipatan ro protocol kamana man ro pag-check kon nakasunod sa 50% nga seating capacity ro saeakyan agud nga indi maperwisyo ro mga driver.
Apang kon amat samtang nagabiyahe hay ginapaeos it mga pasahero eabi eon ro andang face shield.
Malisod suno kana para sa mga driver nga mag-inadwing samtang naga-drive agud eamang nga ma-monitor ro anang mga pasahero rason nga naga apela man sanda sa mga otoridad nga ‘warning’ ukon mas maugan nga multa ro ipapanaog ukon ro pasahero mismo nga pasaway ro pamultahon.
