NUMANCIA, Aklan—Kulong ro sangka person with disability (PWD) nga gina-alegar nga nagaduso it iligal nga droga matapos nga maaresto sa ginkasa nga buy bust operation, agahon it Lunes, Pebrero 10 , 2025 sa Brgy. Albasan, Numancia.
Nakilaea ro suspek nga ginakabig nga street level individual nga si Rey Martin Manares, alyas Mart, 40 anyos ag residente it Brgy. Baybay, Makato.
Ginasugid nga dati man imaw nga job order employee it Aklan provincial capitol nga naka-assign sa Provincial Disaster Risk Reduction and Management Office (PDRRMO)-Aklan nga napilitan nga maghalin sa trabaho bangud sa pirmeng pag-atake it anang ku-eo ukon seizure.
Ro operasyon hay ginpatigayon it gintingub nga pwersa it Provincial Drug Enforcement Unit (PDEU) ag Numancia Municipal Police Station.
Sambilog sa mga awtoridad ro nagpakuno-kuno nga nagbakae it sangka sachet it marijuana kabaylo it P500 nga marked money ag kat magkabayaran eon hay gin-aresto ro suspek.
Nabo-oe sa suspek ro dugang nga tatlo nga mabahoe nga plastic sachet ag siyam nga maisot nga sachet it marijuana.
Sa pihak nga parte, aminado ro suspek nga pila sa mga narekober kana nga droga hay anang ginagamit bilang bueong sa anang sakit .
Raya hay sa pihak it pahayag it anang ama nga regular man nanda raya nga ginabak-ean it anang maintenance nga bueong para sa seizure.
Sa surveillance it mga awtoridad, ginasugid nga pila sa anang mga parokyano hay taga-Albasan, Numancia.
Sa makaron hay nakakulong sa detention facility it Numancia MPS ro suspek ag nagapangatubang sa kasong pag eabag sa RA 9165 ukon Comprehensive Dangerous Drugs Act of 2002.
