LEZO, Aklan—Patay eon kat maka-abot sa aklan provincial hospital ro sangka 49-anyos nga eaeaki matapos nga mabungguan it tricycle bandang alas 3:55 it aga-aga it Miyerkules, Disyembre 18 sa Brgy. Poblacion, Lezo.
Suno kay P/Capt. Gelbert Batiles, hepe it Lezo Municipal Police Station, paagto kunta sa simbahan ro biktimang si Ronald Gregorio, residente it Brgy. Sta Cruz, Lezo agud nga magsimbang gabi .
Apang samtang nagabaktas sa may portion it eskwelahan hay aksidente raya nga nabungguan it nagaragasa nga tricycle nga ginamaneho it sangka 42-anyos nga eaeaki nga aminado nga medyu madasig ro anang pagpadaeagan bangud nga nagahingabot nga makasueod sa anang trabaho sa sangka bakery bandang alas-4 it aga-aga.
Dugang pa nga maueanon ro tiempo ag madueum ro karsada.
Bangud sa impact it pagbunggu, inapok ro biktima ag tumama ro anang ueo sa matig-a nga bagay.
Insigida raya nga gindaea it mga rumespondeng tawuhan it MDRRMO sa ospital apang gindeklarang dead on arrival it nagtatap nga doktor.
Nasayuran nga ro biktima hay sangka PWD bangud nga may diperensiya ro anang paeamatin-an .
Samtang, ginkustodiya it Lezo MPS ro driver para sa nagakaigo nga disposisyon.
