Kaibahan sa ap-at nga koponan it Group A it FIFA World Cup 2022 ro host country nga Qatar.
Sa kasaysayan it FIFA raya ro unang kahigayunan nga maging host ro sangka Arab nation.
Ko Disyembre 2010 pa gin-anunsyo it FIFA ro hosting it Qatar.
Ko 2011 Asian Cup hay naging host man ro Qatar kun sa siin nakasueod sanda sa quarterfinals kat pierdihon ro Jordan sa score nga 2-0 apang owa nakaporma sa Japan nga naging kampeon sa torneo.
Bilang host man it 2014 West Asian Football Federation Championship hay nagkampeon sanda kat pierdihon ro Jordan 2-0.
Owa man sanda nagmadinaeag-on sa group stage nga nagtapos sa pang-ap-at nga puwesto sa Group C it 2015 Asian Cup.
Nag umpisa ro hampang nga football sa Qatar ko 1948 kat maghampang it football ro mga oil workers nga halin sa ibang nasyon ag 1960 kat nabilog ro Qatar Football Association ag matapos ro napueong dag-on hay nagpasakop sanda sa FIFA.
Sa pagahiwaton nga FIFA World Cup nga maga-umpisa sa Nobyembre hay nakalinya sa Group A ro host country kaibahan nanda ro Ecuador, Senegal ag Netherlands.
Ro Group B man hay ginaeakipan it England, Iran, USA, Wales samtang ro Group C hay Argentina, Saudi Arabia, Mexico, Poland ag sa Group D man hay ro France, Australia, Denmark ag Tunisia.
Sa Group E nagapanguna ro Spain, Costa Rica, Germany ag Japan sa Group F hay Belgium, Canada, Morocco, Croatia.
Samtang ro Group G hay ginapangunahan it Brazil, Serbia, Switzerland, Cameroon ag ro Group H hay Portugal, Ghana, Uruguay ag South Korea.
