KALIBO, Aklan–Syento porsyento eon nga haum ro nasyon it Qatar pilang oras antes ro opisyal nga pag-umpisa it opening ceremony it FIFA World Cup 2022 nga pagahiwaton sa Al Bayt Stadium, Al Khor Qatar.
Suno kay Bombo International Correspondent Renier Baldomero Geronimo it Doha, Qatar nga excited eon ro tanan nga masaksihan ro pagbukas it torneo ag makit-an ro nagkaeain-eain nga mga personalidad nga magaperform.
Ro security measures sigon sa bilog nga siyudad hay planstado eon ag hugut nga ginapatuman.
Gina-ekspektar nga mapuno ro venue bangud sold out eon ro mga ticket kung siin naga-demand pa ro mga residente nga mataw-an it ticket agud nga personal nga makatan-aw.
Samtang, may mga LED screen man sigon nga ginbutang ro gobyerno sa mga matawong lugar agud nga libreng makapamantaw ro publiko.
Ginapanan-aw nga magiging daean ro World Cup sa pagbaskog it turismo it nasyon bangud sa mga delegado ag bisita halin sa nagkaeain-eain nga parte it kalibutan.
Angot kara, ro koponan it Argentina, Brazil, France ag United Kingdom ro nagapanguna sa mga matunog nga magadaog sa torneo.//Ro Al Bayt Stadium hay may seating capacity nga 60,000.
Sa pihak nga parte, gintaw-an it punto it sangka football coach nga kinahang-ean maging agresibo it national team it Qatar sa magiging hampang nanda kontra sa Ecuador.
Ginpahayag ni Kyle Justin Marcelino, sangka football coach nga indi dapat maging kampante ro Qatar apisar nga may ginatawag sanda nga homecourt ag crowd advantage.
Gin-insister man kara nga mas mabaskog ro koponan it Ecuador kung ro pagabasehan ro andang game performance.
