KALIBO, Aklan—Owa eun nagakinahangean pa it quarantine pass kung mag-adto sa ibang barangay sa banwa it Kalibo umpisa Setyembre 8.
Suno kay Kalibo Mayor Emerson Lachica nga napagdesisyunan eun it national inter-agency task force kung sa siin igapanaba ro quarantine status sa bilog nga probinsiya it Aklan maghalin sa modified enhanced community quarantine paadto sa general community quarantine.
May kaangtanan kara, nagpueong kahapon nga adlaw ro Provincial Inter-agency task force ag dikara hay ginkasugtanan ro pilang ka mga matabo nga pagbag-o sa pagsinueondan nga nakataeanang igasapinal kung makapaguwa it executive order si Aklan governor Florencio Miraflores.
Nakasueod sa guidelines it GCQ ro pag-lift it barangay checkpoint.
Samtang pagapasugtan man ro dine-in sa mga restaurant ag puwedi eun man nga magbukas ro mga salon ag barber shop apang hasta eamang sa 30 porsiyento it andang kapasidad.
Ginpahabaan man it hasta alas 7:00 it gabi-e ro operasyon it mga busines establishments samtang ro public transport hay hasta it alas 8:00 it gabi-e.
Iga-lift man ro liquor ban ag pagapasugtan eamang ro pag-inom sa sueod it panimaeay.
Magapabilin man ro ginapatuman nga curfew hour umpisa alas-8 it gabi-e hasta alas-4 it agahon.
