KALIBO, Aklan—Ginklaro ni Punong Barangay Niel Candelario it Poblacion, Kalibo nga magapabilin hasta sa katapusan it buean ro mga sueondanan nga ginapatuman sa bilog nga probinsya it Aklan sa idaeom it Modified Enhanced Community Quarantine (MECQ).
Raya hay matapos it ginpagguwa nga anunsyo it National Inter-Agency Task Force (IATF) kun siin naeakip ro probinsya sa mga lugar nga nakaangkon it extension ro quarantine classification.
Buot hambaeon kara, ginakinahang-ean gihapon nga magpakita it quarantine pass it mga pumueoyo nga nagasueod sa kada establisyemento komersyal sa banwa it Kalibo.
Ro pag-isyu sigon it quarantine pass hay kaibahan sa naging pueong it Municipal IATF kun siin sambilog eamang ro pagataw-an kara sa kada pamilya.
Dugang pa ni kapitan Candelario nga ro quarantine pass hay dapat nga gamiton eamang sa mga importanteng paeanawun ukon essential nga bueohaton kapareho it emerhensiya, pagbakae it pagkaon, bueong ag iba pang kinahang-eanon sa sueod it panimaeay.
Angot kara, na-obserbahan man sigon nanda ro amat-amat nga pagnaba sa numero it mga nagpositibo sa COVID-19 matapos nga ipatuman ro paghugut ko unang adlaw it Agosto.
