Ginsupaepae ni House Deputy Minority Leader Bernadette Herrera si Marikina 2nd District Rep. Stella Quimbo sa hearing it Kamara sa budget it free WiFi program it gobyerno. Ginkwestiyon ni Herrera ro paggamit it gobyerno sa pondo nga nakataeana sa free WiFI program it Department of Information and Communications Technology (DICT) sa ibang proyekto.
Depensa ni Quimbo, samtang uwa pa nagagamit it mismong ahensiya ro pondo, mahimo raya nga temporaryong gamiton it gobyerno para sa ibang project. Insigida man sigon raya nga igabalik sa ginbue-an nga ahensya kung ginakinahang ean. Apang insigida man nga ginbara ni Herrera ro posisyon ni Quimbo, sa pagsambit nga ro kwarta nga iga-eaan it laye sa sangka partikular nga bagay hay indi pwedeng gamiton sa ibang project.
Pamilit ni Herrera, mahimo eang nga gamiton ro pondong gintaeana para sa sangka project para sa ibang programa kung may legal nga ginabasehan, kaparehas it laye, presidential decree o international agreement. Kung uwa ro mga legal nga basehan kara, ginhambae ni Herrera nga makabig raya nga “unconstitutional.”
Pangutana pa ni Herrera, siin bue-on it DBM ro pampuno sa nasambit nga pondo kung pagagamiton eon raya it DICT para sa programa kara nga libreng WiFi. Uwa kara it naisabat si Quimbo rason nga ging advice lang kara kay Herrera nga daehon ro anang isyu sa Korte Suprema.
Una eon man nga pinuna ni dating presidential spokesperson ag abogado nga si Salvador Panelo ro pangabuhi ni Quimbo matapos kumalat sa social media ro mga pictures kara nga may suksok raya nga maha-ea-eon nga alahas ag branded nga mga bag nga milyun-milyong piso ro balor kung raya hay naga dangop sa hearing o sesyon it Kamara. uwa pa man it nangin reaksiyon si Quimbo kaangot sa mga naging pahayag ni Panelo.
