KALIBO, Aklan—Kasunod sa ginakabaeak-an nga makaangkon it shortage sa supply it karne it baboy bangud sa nagapadayon nga paeag it African Swine Fever (ASF), sambilog ro karne it rabbit sa mga nakikita it gobyerno nga pwedeng maging alternatibo matapos nga nagkalhit eon hasta sa rehiyon it Mindanao ro nasambitang sakit.
Suno kay Dr. Ronald Lorenzo, agriculturist II it Office of the Provincial Veterinarian (OPVET) Aklan, mas madasig ag madali nga pabahueon ro mga rabbit.
Ginpahayag dugang nga masustansya ag manggaranon sa protina ro karne it rabbit.
Suno pa kay Dr. Lorenzo, may mga nagaalaga it rabbit sa ibang lugar agud nga ibaligya sa mga mahilig magkaon it karne kara.
Apang iya sa probinsya it Aklan hay uwa pa sigon it reported nga may nagabaligya it karne kara mag-eowas sa ginakabig raya nga pet it mga tag-iya.
Nasayuran nga kapin sa 62 porsiyento it kabilugang hog population ro maduea kon inde mapunggan ro pagkalhit it ASF sa Pilipinas makaron nga dag-on 2020.
Haeos 200,000 ka mga baboy eon ro napatay sa mga lugar nga apektado it African swine fever halin kat nakumpirmang nakasueod sa nasyon ko buean it Setyembre 2019.
