KALIBO, Aklan — Matapos ro haeos daywang adlaw nga manhunt operation, naaresto eon it mga pulis ro sangka eaeaking suspek sa pagpanghimueos sa menor de edad ko Biyernes it agahon sa Brgy. Lilo-an, Malinao.
Nakilaea ro suspek nga si Stephen Belarmino, 21, ag residente it Brgy. Cogon sa nasambit nga banwa.
Base sa imbestigasyon it Malinao Police Station, natabu ro insidente samtang nga nagahampang ro 7-dag-on nga biktima sa kilid it suba samtang ro anang 9-dag-on nga magueang nga eaeaki hay nagapangbo-oe it isda.
Gintaw-an sigon it suspek it kwarta ro biktima , apang matapos nga magpamalibad hay gintakpan kara ro anang baba ag gindaea sa unahan maeapit sa andang CR ag idtu gin-umpisahan nga himuslan.
Matapos nga mataeupangdan nga maeuya ag may mantsa it dugo ro eambong it unga hay ginsaysay it biktima sa anang ina ro natabu kana.
Insigida raya nga nagdangop sa kapulisan rason nga ginkasa ro manhunt operation nga nagresulta sa pagka-aresto sa suspek ko domingo nga adlaw.
Depensa it suspek nga daea eamang it anang kahilungon ro anang nahimo.
Apang desidido ro pamilya nga pasakaan it kasong
rape in relation to 7610 ukon child abuse law ro suspek.
