KALIBO, Aklan – Naputos gilayon it kasadyahan ro Kalibo, Aklan, sa bisperas pa eamang it Opening Salvo ukon “Ro Pag-umpisa” it Santo Niño Ati-Atihan Festival 2020.
May kaangtanan kara, bumuhos ag nag-enjoy ro mga nagtan-aw sa Kalibo Magsaysay Park sa performance it bandang Chocolate Factory ag aktor nga si Rayver Cruz nga gin-imbitahan it Kalibo Senior Santo Nino Ati-Atihan Management Council, Inc.
Halin 2012 hasta it 2018 sa idaeom it dating festival manager nga Kalibo Santo Nino Ati-Atihan Foundation, Inc., ro Opening Salvo nga ginbansagang “Sadsad Tamboe” hay ginsaylo sa buean it Oktubre halin sa nakasanayan nga sang dominggo antes ro ikatlong dominggo it Enero.
Mag-eowas sa bansag nga “Mother of all Philippine Festivals,” ro Kalibo Santo Niño Ati-Atihan Festival hay kilaea man sa bilog nga Asya bilang “wildest, craziest” ag ginabantayang atraksyon it international media.
