KALIBO, Aklan—Dapat nga makaangkon it re-enlistment sa hanay it Philippine National Police ukon PNP.
Raya ro naging suhestiyon ni dating Aklan Police Provincial Director ag presenteng Sangguniang Panlalawigan member sa unang distrito it probinsiya nga si Nemesio Neron agud nga matapna eun ag indi maparesan ro pilang ka mga katapo it kapulisan nga nagahimo it makangieidlis nga krimen.
Ginkumpara pa kara ro pagsinueondan it Armed Forces of the Philippines (AFP) kung sa siin may una sandang ginahimo nga re-enlistment sa kada tatlong dag-on agud magpaidaeum sa complete physical and medical examination ro sangka army personnel.
Samtang, makabulig man suno pa kana ro mga media personnel agud nga malikawan ro pag-abusar it mga pulis.
Kung atun sigon nga balikan ro dating tyempo hay nagasunod mismo ro mga media sa ginapatigayon nga operasyon it mga kapulisan rason nga owa eun it question ro publiko sa hitabo.
Dapat man nga gamiton it tama ro gin-isyu nga body camera.
Madumduman nga hasta sa makarun hay owa pa natapos ro problema sa teenager nga ginbaril it mga pulis sa Valenzuela bangud nang-agaw sigon it baril.
Kasunod kara, ginbaril man it hilong nga pulis nga si Master Sgt. Hensie Zinampan it Police Security and Protection Group ro sangka 52 anyos nga babaye nga si Lilybeth Valdez ag residente it Brgy. Greater Fairview, Quezon City.
