KALIBO , AKLAN — Gintambungan it mga matag-as nga opisyal halin sa Kampo Krame ag Police Regional Office (PRO-6) ro reception rites it mga bag-ong appoint nga police officers halin sa Western Visayas nga gin-deploy sa probinsiya it Aklan.
Nagpaidaeum sa nagkaeain-eain nga drills ro 117 nga mga bag-ong graduate nga pulis , kun sa siin , sa pihak it mabudlay nga inagihan hay maswerteng owa it may nalipong ag nalastruhan .
Pagkatapos kara hay nakaangkon sanda it boodle fight .
Nag-abot sa seremonya ro directorate for opertations it Camp Crame nga si P/Major General Emmanuel Luis Licup kamana man si PRO-6 director Brig. Gen. Rene Pamuspusan nga ginsaksihan man ni Aklan Provincial Director Col. Esmeraldo Osia Jr .
Madumduman nga ro mga bag-ong graduate nga pulis ro igadeploy sa Aklan partikular sa isla it Boracay ag Aklan Provincial Mobile Force Company .
Antes ro pagtambong sa reception rites hay naghalin si PMGen Licup sa banwa it Malay, kun sa siin ginpangunahan nana ro inauguration and blessing it Malay Municipal Police Station Command and Control Center.
Ro opisyal man ro nagpanguna sa inauguration and blessing it adoration chapel ag bag-ong renovate nga day care center sa sueod it kampo.
