Kalibo Aklan ———–Gina-umpisahan eon ro recovery efforts sa Australia kasunod it pilang adlaw nga grabeng uean nga nagtuga it maeapnagon nga pagbaha sa mga estado it Queensland ag New South Wales sa Eastern Australia.
Suno kay Bombo International Correspondent Denmark Suede it Sydney, Australia nga ro insidente hay nagtuga it kahalitan sa linibo nga mga pumueuyu matapos nga maeumos ro andang mga propiedad ag kabaeayan.
Normal eamang sigon raya nga uean apang sigidas ag owa it untat.
Ro insidente hay nagtuga it waeong katawo ro patay sa Queensland ag haeos 15,000 nga baeay ro nahalitan.
Maskin sigon sa andang lugar sa Sydney hay nakaexperiensiya man it grabeng pagbaha.
Madumduman nga nag deploy ro emergency departments it mga baroto agud nga mabuligan nga maka-evacuate ro mga residente halin sa nagatinaas nga tubi-baha ag mga helicopters nga nag-airlift sa mga stranded sa bungbungan it mga baeay.
Gindugang pa ni Suede nga ginpasiguro man it andang gobyerno ro nagakaigo nga bulig sa mga nabiktima it baha sa nasambit nga mga estado pinaagi sa pagtau it financial assistance nga 1,000 dollars per adult ag 400 dollars sa mga unga.
Kaibahan sa mga naapektuhan hay ro Filipino community.
