Haeos 20 anyos eon sigon ro nagakatabu nga recycling it shabu, suno sa informant ukon asset it Philippine National Police ag Philippine Drug Enforcement Agency (PDEA) kat mag-atubang sa pagpamati it House Committee on Dangerous Drugs nga ginapamunuan ni Surigao del Norte Rep. Robert “Ace” Barbers.
Gin aku it informant nga droga man ro ginabaton nana nga reward ag bukon it cash.
Suno sa informant, 30 hasta 70 percent ro nabobo-oe nana nga reward.
Ro grabe sa ginbulgar it informant, bukon it tanan nga mga nakukumpiskang droga hay gina deklara it mga miyembro it drug enforcement unit.
Suno sa impormante, sa 100 kilo it drogang nakumpiska, 22 kilo eamang ro ginadeklara it mga awtoridad.
Gina-recycle ro droga ag uman nga ginabaligya sa mga drug user.
Kato pa napabalita ro makarondaya nga kalakaran apang mas maka-alarma kun sa mismong bibig it informant magahalin ro pagbulgar.
May mga “bugok” gid man nga miyembro ro PNP ag PDEA nga ginakitaan ro pag-recycle it shabu
Ag may kamatuoran nga daywang dekada eon raya nga gina-obra it mga “bugok” nga miyembro it PDEA ag PNP.
Pamatuod eamang ro pagka-aresto sa PDEA official ag sa daywa nana nga tawuhan ko Disyembre sa PDEA-Taguig sa sangka buy-bust operation.
Naga-recycle sanda it shabu.
Ginabalik nanda sa kalye ro andang nakumpiska.
Nagakadapat pa nga magpatigayon it madaeum nga imbestigasyon ro Kongreso sa ginbulgar ngara it impormante.
Indi matapos ro problema sa illegal nga droga samtang una sa puwesto ro mga “bugok” nga drug enforcers.
Pabalik-balik eang ro problema it illegal nga droga.
Dapat eon nga utdon ro saea nga sistema nga droga ro ginabayad sa tipster.
Nauna eon nga ginbulgar ni PDEA Director General Virgilio Moro Lazo sa pagpamati it House of Representatives ko Pebrero ro angot sa pagtau it 30% it narekober nga droga sa tipsters.
Owa raya nagakabagay.
Kwarta ag bukon it droga ro dapat nga ibayad sa tipster.
Ginkontra it PNP ro ginhambae it PDEA director.
Suno kay PNP chief information officer Col. Redrico Maranan, ilegal ro pagtau it droga sa impormante bangud nga ro mga narekober nga droga hay dapat isumite sa korte bilang ebidensiya.
Usisaon pa ro angot sa nasambit nga isyu.
Masyado eon nga maka-alarma ro problema sa illegal nga droga.