KALIBO, Aklan—Uman nga nagpaandam ro Regional Anti Cyber Crime Unit 6 it Philippine National Police ukon PNP sa publiko nga magdahan sa mga naga-eapnaag makaron nga online scam.
Raya hay kasunod it pagsakdag it publiko sa e-commerce sa atubang it naexperiensiyahan nga covid 19 pandemic.
Suno kay P/Cpl. Emerito Frutas, Jr. nga nagtaas ro mga cybercrime cases nga gin-report kanda eabi eon makaron nga tiempo nga mas babad online ro mga tawo bangud sa pandemya.
Bangud kara, nagapanguna ro scam sa may pinakamaabu nga numero it kaso it cybercrime ag nagapangaywa eon lang ro libel.
Gindugang pa ni Cpl. Frutas nga maabu ro nabiktima it online selling scam.
May pilang nagabaligya sigon online nga owa man it matuod nga aktwal nga ginabaligya.
Kaeabanan sa mga gina-post it mga scammer hay ro mga maeahaeon nga item halin sa mga sikat nga brand partikular ro mga eambong ag electronic device sa baratong presyo.
Sa makarondaya nga modus, pagkatapos nga makabayad hay iga-block eon it scammer.
Nagpadumdum man imaw kontra sa mga scammers online nga nagapangloko pinaagi sa love ukon romance scam.
Aminado si Cpl. Frutas nga naging trend man ko nagtaliwan nga eleksyon ro hacking ag identity theft kun sa siin pila sa mga raya hay andang na-trace.
Posible sigon nga makasuhan ro mga raya sa idaeum it RA 10175.
Pila pa sa mga scam nga ginreklamo kanda hay ro text scam, naga offer it trabaho online, skimming ag iba pa.
Samtang, engkaso nga naging biktima it modus, pwedeng magdangop sa andang taeatapan ukon makipag angot sa Facebook page it anti cybercrime unit 6.
