KALIBO, Aklan—Pwede eon nga ma-fil-apan it mga voter applicants para sa nagahilapit nga Mayo, 2022 national and local elections ro registration form online pinaagi sa iRehistro it Commission on Elections ukon Comelec.
Bangud kara, ginpahayag ni Crispin Raymund Gerardo, tagapaghambae it Comelec-Aklan nga antes nga mag agto sa andang mga opisina, gina engganyo ro tanan nga sabtan anay ro application forms parasa mga impormasyong kinahangean pinaagi sa pag-agto sa irehistro.comelec.gov.ph/cef1.
Apang kinahangean sa gihapon nga ro aplikante hay personal nga mag-agto sa andang opisina para sa QR scanning ag biometrics data capture ukon pagbo-oe it litrato, fingerprints, ag pirma agud nga makompleto ro proseso it filing.
Pwede man sigon nga mano-mano ro pag-fill-up it forms.
Ginpaathag ni Gerardo nga ro pagsabat sa online form hay owa nagakahueugan nga automatic ka eon nga registered voter.
Tatlong kopya sigon it online application forms ro kinahangean nga ipasa.
Ginapapili man sigon ro mga aplikante it klase it application nga andang gina-file kapareho it registration, transfer of registration record, reactivation of registration record, change of name bangud sa marriage ukon court order/correction of entries sa voters’ registration record, ag inclusion it records sa book of voters/reinstatement of name sa listahan it botante.
Ginpahayag dugang nga ro applications para sa registration hay pwedeng ipasa halin Lunes hasta Huwebes, alas 8 hasta alas 3 it hapon sa taeatapan it election officer.
Ginpahayag pa ni Gerardo nga ro kwalipikadong magapa-rehistro hay ro mga naga edad it 18-anyos antes ukon sa mismong adlaw it eleksyon ukon Mayo 9, 2022; residente it Pilipinas sa sueod it kapin sa sang dag-on ag naga istar sa lugar nga kun sa siin imaw magaboto sa sueod it kapin sa 6 nga buean sa antes ukon sa mismong adlaw it eleksyon.
Magdaea sigon it valid ID ag birth certificate sa mga naga-agto sigon sa opisina it comelec, hugut nanda nga ginapatuman ro mga minimum health protocols sa tunga it paeag it COVID-19 pandemic.
