KALIBO, Aklan — Gintapos eon it Boracay Inter-Agency Task Force (BIATF) sa pagpanguna it Department of Environment and Natural Resources ro rehabilitasyon ag pagdumaea sa Isla it Boracay.
Raya hay matapos ro ap-at nga dag-on nga maeapnagon nga rehabilitasyon sa pinaka-sikat nga tourist destination sa nasyon.
Ginpasa eon ni DENR Acting Secretary ag BIATF Chairman Jim Sampulna ro pagdumaea sa isla sa lokal nga gobyerno it Malay ag provincial government it Aklan.
Aminado si Sampulna nga mabahoe nga hangkat para sa nagadumaea sa banwa it Malay ag Aklan ro pagpabilin it kalimpyo sa isla partikular ro pagdisiplina sa mga residente kara ag turista.
Nauna eon nga ginbilog ro BIATF, kun sa siin vice-chairman ro Department of Tourism ag Department of the Interior and Local Government ni Pangueong Rodrigo Duterte pinaagi sa Executive Order No. 53 ko May 8, 2018.
Magatapos kunta ro termino it task force ko 2020, apang raya hay ginpaeawig ni Pangueong Duterte hasta ko May 8, 2021 sa pagpaguwa it EO 115 ko May 11, 2020 ag uman nga ginpaeawi hasta sa June 30, 2022 sa gahum it EO 148 kasunod sa pagtapos it termino it pangueo.
Madumduman nga ginbansagan nga cesspool ni Duterte ro Boracay rason nga ko April 26, 2018, temporaryo raya nga ginpasarado sa publiko bilang kaparte it pagtinguha it gobyerno nga ma-rehabilitate ag ma-redevelop ro isla sa sueod it an-um nga buean.
