KALIBO, Aklan—Inde pa mahueag hasta sa makaron ro nakataeana kunta nga rehabilitation it Kalibo public market matapos ro mabahoe nga sunog ko buean it Setyembre 15, 2019.
Suno kay Municipal Economic Enterprise Development Office ukon MEEDO Kalibo head Jessie Fegarido, kapin sa P5 milyon pesos pa eamang sigon ro pondo nga haom para sa implementasyon it nasambit nga proyekto ag ro ibang pondo nga kinahang-eanon hay uwa pa it klaro kon siin raya boe-on.
May mga nagpromisa man sigon nga matag-as nga opisyal it gobyerno apang hasta sa makaron hay uwa pa it nakaabot nga pondo sa lokal nga gobyerno it Kalibo.
Ro pokus sigon nanda makaron hay makausoy it kongkretong lugar para temporaryong mahalinan it mga vendors nga inde man sanda mapaeayo sa bumaeakae agud nga engkasong maumpisahan ro bag-ong public market hay uwa eon it sagabal sa construction.
May mga plano eon sigon ro LGU apang kueang pa sa proseso ag budget.
