KALIBO, Aklan—Magapadayon ro nagkaeain-eain nga rehabilitation projects sa isla it Boracay maskin nga matapos eon ro termino ni Pangueong Rodrigo Duterte sa Hunyo 30.
Suno kay Martin Jose Despi, general manager it Boracay Inter-Agency Rehabilitation and Management Group (BIARMG), ro nasambit nga mga proyekto hay padayon nga igaimplementar it natungdan nga ahensya it gobyerno bangud nga ro ginkriar nga Boracay Inter-Agency Task Force (BIATF) nga nagamanehar sa rehabilitasyon sa isla hay magatapos eon man sa buean it Hunyo.
Dugang pa ni Despi, ro pila sa mga mayor nga proyekto nga kinahang-ean nga makumpleto hay ro clearing it structures sa beachfront, ro main road ag ro forest lands.
Target makaron it BIATF nga mademolish ro 38 pang istrakturang nakitaan it pag-eabag sa 30-meter beach easement.
Raya hay ginakaeakipan it pitong commercial properties, an-om nga residential structures ag 25 nga panimaeay it mga local nga residente.
Samtang, kapin man sa 158 pang istraktura ro nakasueod sa road easement sa circumferential road ro kinahang-ean nga makakas nga kaeabanan hay mga residential structures maghalin sa sangka mall paadto sa Barangay Yapak sa nasambit nga isla.
