KALIBO, Aklan—Ginatugyan eon lang it tagreklamo nga si Eddie Andrade sa Commission on Elections ukon Comelec ro pagresolbar sa anang ginpasaka nga reklamo angot sa vote buying kontra kay kagawad Palmy Meliton ag sa iba pang mga kapartido kara.
Kumpiyansa sigon imaw nga masarangan nana nga mapamatud-an nga may natabu nga vote buying bangud sa mga ebidensiya nga anang ginsumite.
Dugang pa nga owa man imaw nahadlok nga mabalikan it kaso bangud nga malimpyo ro anang konsensiya ag kamatuoran ro anang ginabuytan.
Tuyo sigon it anang aksyon nga matapna eon ro maeapnagon nga baeak-ean it boto sa andang barangay kada may mga eleksyon.
Ginpamalibaran man nana nga may tawo nga sa likod it anang pagdihon it reklamo bangud nga owa imaw it grupo nga ginasuportahan.
Malabo man suno kana ro gina alegar ni punong barangay Jessie Morales nga may kaakig imaw kara bangud sa pagpahalin kana bilang barangay tanod bangud nga pilang dag-on eon ro nagtaliwan ag nakatutuk makaron ro anang atensyon sa anang negosyo.