KALIBO, Aklan – – – Desisyon eon lang ni Pangueong Rodrigo Duterte ro ginahueat kon engkasong pagabatunon kara ro rekomendasyon it inter-agency task force nga ginakaeakipan it interior, environment ag tourism departments nga ipasarado ro isla it Boracay sa sueod it sang dag-on agud taw-an it daean ro rehabilitasyon.
Apang ginklaro ni Department of Interior and Local Government (DILG) Assistant Sec. Epimaco Densing III nga posibling inde eon makaabot it sang dag-on engkasong matapos gilayon ro rehabilitasyon.
Punterya it inter-agency task force nga i-anunsiyo ni Pangueong Duterte ro “total closure” sa isla antes mag semana santa.
Sa Abril 26, 2018 kunta ro punterya nanda nga maumpisahan ro closure agud masakop kara ro pagkansela sa ginabantayan nga “La Boracay” nga ginadagsa it nagaabot sa 30 mil nga mga turista nga nagaaywan it grabeng tambak it basura sa isla.
Ginklaro dugang ni ASEC Densing nga ro “total closure” sa isla hay nagakahueogang it uwa gabaton it mga turista apang magapabiling bukas ro mga negosyo.
Sa makaron suno kana hay may mga nakapresentar eon nga programa ro Department of Labor and Employment (DOLE) ag Department of Trade and Industry (DTI) para sa mga mawad-an it trabaho.
Samtang,positibo man ro opisyal sa magiging epekto it rehabilitasyon ag ginpasiguro nga magabulig ro tourism department sa uman nga pagahimuong pag-promote sa isla kon siin nakahaom eon sigon ro bonggang re-launching kara sa oras nga matapos ro rehabilitation efforts.
