KALIBO, Aklan—Nagapadayun ro relocation it mga poste it kuryente sa isla it Boracay bilang kaparte sa gihapon it nagapadayun nga rehabilitasyon sa isla.
Suno kay Aklan Electric Cooperative (Akelco) general manager Engr. Alexis Regalado nga nagapabilin nga problema sa andang trabaho ro right of way ukon ginasayluhan it andang mga poste.
Kaabuan sigon sa andang mga poste sa isla hay naapektuhan it ginpatuman nga 12-meter nga eapad it main road.
Ginaduso sigon nanda ro pag-upgrade sa kapasidad it distribution lines ag power substations agud nga masabat ro ginaeauman nga pagtaas it power demand sa Boracay sa masunod nga mga dinag-on.
Ginpahayag pa ni Engr. Regalado nga umpisa nga ginbuksan ro isla halin sa 6 nga buean nga rehabilitasyon tuga it environmental problem hay nagtaas ro demand it kuryente nga halin sa 28 megawatts hay naga-abot makaron sa 31 megawatts.
Bangud kara, plano nanda nga uman nga magbutang it dugang nga 13-MVA power substation sa isla agud nga makadugang sa naga-eksister nga 13-MVA boracay sub-station ag caticlan 10-MVA substation.
